Gürcüstanın Daxili İşlər Nazirliyinin (DİN) Miqrasiya İdarəsi son günlər həyata keçirilən tədbirlər nəticəsində azərbaycanlılar da daxil olmaqla 61 əcnəbini ölkədən deportasiya edib.
Oxu.Az xəbər verir ki, bu barədə Gürcüstan DİN-in sosial şəbəkə hesabında məlumat verilib.
Məlumata görə, idarə tərəfindən həyata keçirilən kompleks tədbirlər zamanı Hindistan, Misir, Türkiyə, Kuba, Azərbaycan, Türkmənistan, Rusiya, Nigeriya, Ermənistan, Belarus, Özbəkistan, Burundi, Efiopiya və Pakistan vətəndaşları ölkədən çıxarılıblar.
Mövcud qanunvericiliyə əsasən, deportasiya edilən şəxslərin yenidən ölkəyə girişinə qadağa qoyulub.
Xəbərdə bildirilir ki, bu ilin statistik göstəricilərinə əsasən, Miqrasiya İdarəsinin əməkdaşları tərəfindən artıq 3 minə yaxın şəxs Gürcüstandan deportasiya edilib. Bu rəqəm ötən ilin ümumi nəticələrindən əhəmiyyətli dərəcədə çoxdur.
