ABŞ-nin şimal-şərqində yaşayan sakinlər şənbə günü Boston səmasında trotil ekvivalentində təxminən 300 ton gücündə meteorun parçalanması nəticəsində partlayış səsini xatırladan güclü gurultu eşidiblər.
Oxu.Az xəbər verir ki, bu barədə NASA "X" sosial şəbəkəsində məlumat yayıb.
"Milli Okean və Atmosfer Tədqiqatları İdarəsinin (NOAA) "GOES-19" peyki mayın 30-da Şərq sahili vaxtı ilə saat 14:06-da (Bakı vaxtı ilə 22:06 - red.) yüksək səslə müşayiət olunan parlaq bolidi qeydə alıb. Görünür, meteor Massaçusets ştatının şimal-şərqi və Nyu-Hempşirin cənub-şərqi üzərində, təxminən 40 mil yüksəklikdə parçalanıb. Parçalanma zamanı ayrılan enerji təxminən 300 ton trotil ekvivalentində qiymətləndirilir ki, bu da eşidilən güclü səs-küyü izah edir", - deyə NASA-nın açıqlamasında bildirilib.
"The New York Times" qəzetinin yazdığına görə, gurultu Boston aqlomerasiyası və Rod-Aylend ştatının sakinləri arasında sosial şəbəkələrdə geniş müzakirələrə səbəb olub. İstifadəçilər arasında nüvə zərbəsi və hətta yadplanetlilərin istilası ilə bağlı müxtəlif fərziyyələr də səsləndirilib.
Boston polisinə Massaçusets ştatının müxtəlif bölgələrindən çoxsaylı zənglər daxil olub. Hüquq-mühafizə orqanları hadisənin səbəbini araşdırmaq üçün əməkdaşlarını şəhərin Brayton rayonuna göndəriblər.
Amerika Meteor Cəmiyyətinin icraçı direktoru Karl V.Hergenroter nəşrə açıqlamasında bildirib ki, Boston və ətraf ərazilərin sakinləri buludlu hava şəraiti səbəbindən hadisənin əsl səbəbini görə bilməyiblər.
