Əfqanıstanda hakimiyyətdə olan "Taliban" ölkədə internetin qadağan olunması ilə bağlı yayılan iddiaları təkzib edib.
Oxu.Az-ın "Associated Press"ə istinadla xəbərinə görə, hərəkatın sözçüsü Zəbihullah Mücahid bu barədə bəyan edib.
Onun sözlərinə görə, yayılan məlumatlar həqiqətə uyğun deyil:
"Guya interneti qadağan etməyimizlə bağlı xəbərlər əsassız şayiələrdir. İnternetin müvəqqəti dayanmasına səbəb optik-lifli kabellərin sıradan çıxmasıdır və bu səbəbdən təmir işləri aparılır".
Lakin xidmətin tam bərpa olunacağı vaxt açıqlanmayıb.
Xatırladaq ki, bundan əvvəl BMT Əfqanıstanda internetin kəsilməsinin zəlzələdən zərər çəkənlərə yardımın göstərilməsini çətinləşdirdiyini bildirmişdi.
Əfqanıstan əhalisi internet əldə etmək üçün Pakistan sərhədinə doğru axın edir.
Oxu.Az-ın məlumatına görə, bu barədə sosial şəbəkələrdə görüntülər yayılıb.
Kadrlarda sakinlərin yolboyu maşından düşərək şəbəkə axtardıqları görünür.
Qeyd edək ki, "Taliban" "əxlaqsızlığın qarşısını almaq" məqsədilə bütün ölkədə internet rabitəsini ləğv edib. Bağlantının kəsilməsi aviasiya, bank, ticarət və media yayımı daxil olmaqla həyati əhəmiyyətli xidmətlərin fəaliyyətinə ciddi təsir göstərib.
Artıq Kabildə beynəlxalq hava limanı uçuşları dayandırıb. Aviaşirkətlər əlaqə imkanları olmadan uçuşları koordinasiya edə bilmədikləri üçün fəaliyyətlərini müvəqqəti dondurublar.
