Hindistanda qəzəbli izdiham "Qırmızı kitab"a düşmüş pələngi vəhşicəsinə öldürdü

Hindistanın Assam əyalətində şok hadisə baş verib - min nəfərdən ibarət qəzəbli izdiham kral benqal pələngini vəhşicəsinə öldürüb.

Oxu.Az-ın "South China Morning Post"a istinadən verdiyi xəbərə görə, nəsli kəsilməkdə olan və "Qırmızı kitab"a düşən heyvan Kaziranqa milli parkından 20 km aralıda meşəlik ərazidə öldürülüb.

"Times of India" qəzetinin yazdığına görə, nizə və dəmir çubuqlarla silahlanmış yerli sakinlər bir neçə aydır ərazidə gəzən, mal-qaraya hücum edən, bəzi məlumatlara görə, bir nəfəri öldürən yırtıcı heyvanı məqsədli şəkildə ovlayıblar. Pələngi tapandan sonra insanlar onu ​​vəhşicəsinə öldürüb, pəncələrini, qulaqlarını, caynaqlarını və dəri parçalarını kəsib qənimət kimi götürüblər.

Heyvanı qorumaq istəyərkən üç meşə gözətçisi yaralanıb. Polis araşdırmalara başlayıb və qətliam iştirakçılarından birini həbs edib. Yarılma zamanı pələngin soyuq silahla hücum nəticəsində aldığı yaralar səbəbindən öldüyü məlum olub. Pələngin qalıqları kremasiya edilib.