19 iyun 2025-ci il tarixində səhər saatlarında İrandan buraxılan ballistik raket İsrail ordusunda ciddi narahatlığa səbəb olub.
Oxu.Az-ın məlumatına görə, bu barədə "Qaley SAXAL" radiostansiyası öz mənbələrinə istinadla xəbər verib.
Bildirilir ki, raketin döyüş başlığı bir neçə hissəyə ayrılıb və parçalar ölkənin mərkəzi bölgələrinə - Or-Yehuda, Yaffa, Savion və digər ərazilərə düşüb.
Məlumatda qeyd olunur ki, bu tip başlıqlar əsasən nüvə silahı daşıyan qitələrarası ballistik raketlərdə olur və onları son mərhələdə zərərsizləşdirmək çox çətindir. Hazırda İsrailin Hərbi Hava Qüvvələri və arxa cəbhə komandanlığı istifadə olunan silahın dəqiq tipini və mənşəyini araşdırır.
Hərbi müxbir Doron Kadoşun sözlərinə görə, mümkün partlayıcı maddələrin düşdüyü yerlərə mühəndis-istehkamçı qruplar göndərilib. İddia olunan raket başlığı fərdi hədəf təyinetmə blokları ilə təchiz olunmuş bölünən başlıqdır ki, bu da bir raketlə eyni vaxtda bir neçə hədəfi vurmağa imkan verir. Belə başlıqlar adətən atmosferdənkənar məkanlarda ayrılır.
