Pentaqon rəhbərinin müşaviri Den Kolduell məlumat sızıntısı ilə bağlı araşdırma fonunda inzibati məzuniyyətə göndərilib.
Oxu.Az-ın məlumatına görə, bu barədə "Associated Press" (AP) agentliyi hərbi idarənin iki məmuruna istinadən xəbər verir.
Nəşrə görə, inzibati məzuniyyətə göndərilən Kolduell çərşənbə axşamı mühafizə əməkdaşları tərəfindən Pentaqon binasından "çıxarılıb".
Mənbələrin sözlərinə görə, bu, nazirliyin icazəsiz məlumat açıqlaması ilə bağlı araşdırma ilə əlaqədardır, lakin onlar hansı araşdırmadan söhbət getdiyini dəqiqləşdirməyiblər.
Agentlik qeyd edir ki, Kolduell müdafiə naziri Pit Heqset tərəfindən "Signal" mesencerindəki söhbətdə koordinator kimi göstərilib. Bu söhbətdə Heqsetin özü də daxil olmaqla yüksəkrütbəli amerikalı məmurlar Yəmənin husi qruplaşmasına qarşı zərbə planlarını müzakirə ediblər ki, bu da qalmaqala səbəb olub.
Mart ayının sonunda "The Atlantic" nəşrinin baş redaktoru Ceffri Qoldberq təsadüfən mesencerdəki qapalı söhbətdə olduğunu və orada Heqsetin ölkənin vitse-prezidenti C.D.Vens, milli təhlükəsizlik üzrə müşavir Mayk Uolts və dövlət katibi Marko Rubio ilə Yəməndəki husi obyektlərinə zərbə endirmək planlarını müzakirə etdiyini bildirmişdi.
