Rusiyada İkinci Qərb Dairə Hərbi Məhkəməsi Rusiya Silahlı Qüvvələrinin radiasiya, kimyəvi və bioloji müdafiə qüvvələrinin rəisi, general-leytenant İqor Kirillova və onun köməkçisi mayor İlya Polikarpova qarşı terror aktında ittiham olunan Axmadjon Kurbonovu ömürlük həbs cəzasına məhkum edib.
Oxu.Az-ın xəbərinə görə, bu barədə TASS-ın müxbiri məhkəmə zalından məlumat verib.
"Məhkəmə Axmadjon Kurbonovun günahkar bilinməsi barədə qərar çıxarıb və ona ilk 10 ilini həbsxanada, qalan hissəsini isə xüsusi rejimli cəza koloniyasında çəkməklə ömürlük həbs cəzası verib, həmçinin bir milyon rubl (21 800 manat) məbləğində cərimə tətbiq edib", - deyə hakim bildirib.
Kurbonov günahını etiraf edib və istintaqla fəal əməkdaşlıq edib. Digər təqsirləndirilən şəxslər Kurbonovun terrorizmdə iştirakından xəbərsiz olduqlarını deyiblər. Toçiyev və Padiyev məhkəmədə iddia ediblər ki, ancaq mənzilin kirayəyə verilməsi ilə məşğul olublar. Safaryanın sözlərinə görə partladan şəxsə verdiyi bağlamanın içindəkindən xəbərsiz olub.
Məhkəmənin növbəti qərarı ilə partlayıcı maddələri çatdıran, Bakıda doğulan erməniəsilli Rusiya vətəndaşı Robert Safaryan 25 il müddətinə azadlıqdan məhrum edilib.
Cinayətkara kirayə mənzil verən İnquşetiya əsilli Batuxan Toçiyev və Ramazan Padiyev müvafiq olaraq 22 il (ilk səkkiz il həbsdə) və 18 il (ilk altı il həbsdə) müddətinə azadlıqdan məhrum ediliblər, eləcə də 200 000 rubl (təxminən 4 300 manat) məbləğində cərimə olunublar.
Təqsirləndirilən şəxslər terror təşkilatının təşkili və təşkilatda iştirak, terror hücumunun hazırlanması, həmçinin partlayıcı maddələrin qanunsuz dövriyyəsi və partlayıcı qurğununun istehsalında ittiham olunublar.
Xatırladaq ki, generalın qətli 17 dekabr 2024-cü il səhər Moskvanın Ryazan prospektində baş verib. İstintaqın məlumatına görə, Ukrayna Təhlükəsizlik Xidmətinin təlimatı ilə hərəkət edən Özbəkistan vətəndaşı Kurbonov general Kirillovun binasının girişində elektrik skuter qoyub və skuterin sükanında radio ilə idarə olunan bomba olub. General İqor Kirillov və köməkçisi mayor İlya Polikarpov binadan çıxarkən partlayış baş verib və hər ikisi həlak olub.
