"Soyuz MS-25" kosmik gəmisinin ekipajı ən uzunmüddətli missiyadan sonra Yerə qayıtdı

Rusiyanın "Soyuz MS-25" kosmik gəmisi sentyabrın 23-də - ekspedisiyanın başlamasından bir il sonra ən uzunmüddətli missiyasını yerinə yetirərək Beynəlxalq Kosmik Stansiyanı tərk edib və ekipajla birlikdə Qazaxıstan çölünə eniş edib.

Oxu.Az-ın Rusiya KİV-ə istinadən xəbərinə görə, bu barədə "Roskosmos"un Mətbuat Xidmətindən məlumat verilib.

Həmçinin, kosmik aparatın Yerə enməsinin birbaşa görüntüləri yayımlanıb.

"Bu gün Moskva vaxtı ilə saat 14:59-da kosmonavtlar Oleq Kononenko, Nikolay Çub və astronavt Treysi Daysonun olduğu "Soyuz MS-25" kosmik gəmisinin eniş aparatı Qazaxıstanın Jezkazqan şəhəri yaxınlığında yerə enib", - deyə məlumatda bildirilib.

Qeyd edək ki, sentyabrın 23-də səhər saatlarında kosmik gəmi "Priçal" modulundan ayrılıb. "Roskosmos"un məlumatına görə, gəminin orbitdən çıxarılması və Yerə enməsi gözlənildiyi şəkildə baş verib.

"Soyuz MS-25" kosmik gəmisinin ekipajı ən uzunmüddətli missiyadan sonra Yerə qayıtdı