"Taliban" Əfqanıstanın Baqram şəhərində ABŞ-nin aviabazası ətrafında yaşayan sakinlərə bir ay ərzində evlərini tərk etmək əmri verib.
Oxu.Az xəbər verir ki, bu barədə "Kabul Tribune" portalı Pərvan vilayətindən olan iki yerli mənbəyə istinadla məlumat verib.
Bildirilir ki, "Taliban" rəhbərliyi buna iki səbəb göstərib: baza ətrafında mümkün hücumlar zamanı mülki itkilərin qarşısını almaq və yerli əhalinin hərəkatın fəaliyyətləri barədə məlumat ötürmək riskini azaltmaq.
Qeyd olunur ki, artıq hərəkatın bəzi komandirləri və döyüşçüləri ailələrini vilayətdən çıxarıblar.
"Taliban" məsələ ilə bağlı hər hansı rəsmi açıqlama verməyib.
O da vurğulanır ki, bu addım ABŞ Prezidenti Donald Trampın Baqramdakı bazanı "Taliban"dan geri almağa söz verməsindən sonra atılıb. Tramp həmçinin xəbərdarlıq edib ki, əgər qruplaşma bazanı ABŞ nəzarətinə qaytarmaqdan imtina etsə, pis hadisələr baş verəcək. Hərəkat isə öz növbəsində bazanı ABŞ-yə təhvil verməyəcəyini bildirib.
