Türkiyə parlamenti PKK terror təşkilatının tərk-silah edilməsi haqqında qanun layihəsini səs çoxluğu ilə qəbul edib.
Oxu.Az NTV telekanalına istinadən xəbər verir ki, sənəd 12 saatlıq müzakirədən və maddələr üzrə səsvermənin yekunlarına əsasən qəbul olunub.
Sənədin lehinə 460, əleyhinə isə 87 deputat səs verib. Yeddi millət vəkili bitərəf qalıb.
Təxminən 360 deputatın imzaladığı qanun layihəsini parlamentə Türkiyə Prezidenti Rəcəb Tayyib Ərdoğanın rəhbərlik etdiyi hakim Ədalət və İnkişaf Partiyası (AKP) təqdim edib.
12 maddədən ibarət olan sənəd PKK-nın buraxılması prosesinin hüquqi bazasını yaradır. Qanun prezident tərəfindən imzalandıqdan və rəsmi hökumət qəzetində ("Resmi Gazete") dərc edildikdən sonra qüvvəyə minəcək.
Qeyd edək ki, PKK-nın buraxılması prosesinə 2025-ci ilin fevralında başlanılıb.
