Venesuelada prezident kimi and içmək istəyən şəxsin yerini deyənə 100 min dollar veriləcək

Venesuelada müxalifət lideri Edmundo Qonsalesin tutulması üçün onunla bağlı məlumat verəcək şəxslərə mükafat təyin edilib.

Bu barədə Oxu.Az "Haber Global"a istinadən xəbər verir.

Məlumata görə, Venesuela hazırda İspaniyaya sığınan və ölkənin paytaxtı Madriddə yaşayan Qonsalesin saxlanmasına kömək edəcək şəxslərə 100 min dollar ödəyəcək.

Ödənişin edilməsini ölkənin Elmi, Cinayət və Kriminalistik Araşdırmalar Assosiasiyası (CICPC) öz öhdəsinə götürüb.

"Qonsales respublikaya qarşı zorakılıq aktlarının dəstəklənməsi, vəzifə səlahiyyətlərinin mənimsənilməsi, sənədlərin saxtalaşdırılması, çirkli pulların yuyulması, dövlət qurumlarına etinasızlıq, qanuna itaətsizlik və cinayət təşkilatı yaratmaq ittihamları ilə axtarışa verilib", - deyə CICPC bildirib.

Eyni zamanda, Edmundo Qonsalesin Argentinaya gedəcəyi və orada Prezident Xavyer Miley tərəfindən qəbul ediləcəyi barədə xəbərlər yayılıb. Siyasətçi özü Argentinaya sığınacağı iddialarına hələ ki rəsmi cavab verməyib.

Qeyd edək ki, Qonsales daha əvvəl mediaya verdiyi bir neçə açıqlamada Venesuelaya gəlmək və 10 yanvar 2025-ci ildə prezident kimi and içmək istədiyini bəyan etmişdi.

Venesuelanın daxili işlər və ədliyyə naziri Diosdado Kabelyo 29 noyabr 2024-cü il tarixli açıqlamasında onun Venesuelaya ayaq basdığı ​​andan etibarən nəzarətə alınacağını bildirmişdi.

"Edmundo Qonsalesin and içmək üçün Venesuelaya gəlməsi ehtimalı belə yoxdur", - deyə o qeyd etmişdi.

Xatırladaq ki, Kabelyo Prezident Nikolas Maduronun 28 iyul seçkisində qalib gəldiyini və 10 yanvar 2025-ci ildə Milli Məclis qarşısında and içəcəyini vurğulamışdı.

Bildirək ki, Milli Seçki Şurasının iyulun 29-da açıqladığı nəticələrə görə, Nikolas Maduro 51,2 faiz səslə üçüncü dəfə prezident seçkisində qalib gəlib.

Müxalifət koalisiyasının namizədi Qonsales və müxalifət lideri Maria Korina Maçado seçkinin nəticələrini rədd ediblər. Barəsində həbs qərarı çıxarıldıqdan sonra Qonsales sentyabrın 8-də həyat yoldaşı ilə birlikdə İspaniya Hərbi Hava Qüvvələrinə məxsus təyyarə ilə Karakasdan Madridə gedib.