XXI əsrin ilk qadın ekipajı kosmosu fəth etdi: Aralarında dünyaca məşhur xanımlar var

"Blue Origin" şirkəti "NS-31" missiyası çərçivəsində kosmik turist uçuşunu uğurla başa çatdırıb.

Oxu.Az xəbər verir ki, uçuş "Blue Origin"in saytında canlı yayımlanıb.

Bu, "New Shepard" raketinin ümumi olaraq 31-ci və tamamilə qadınlardan ibarət ekipajla ilk turist uçuşu olub.

Raket təkrar istifadə oluna bilən qaldırıcı və sərnişin kapsulundan ibarətdir. Bu dəfə suborbital uçuşa amerikalı pop müğənni Keti Perri, "Blue Origin"in təsisçisi Ceff Bezosun nişanlısı Loren Sançez, televiziya aparıcısı Qeyl Kinq, ABŞ Milli Aeronavtika və Kosmik İdarəsinin (NASA) keçmiş mühəndisi Eyşa Bouv, bioastronavtika üzrə mütəxəssis Amanda Nquyen və kinoprodüser Keriann Flinn qatılıblar.

Uçuşdan əvvəl şirkətdən qeyd edilib ki, bu start 1963-cü ildə SSRİ kosmonavtı Valentina Tereşkovanın uçuşundan bəri tamamilə qadın ekipajı ilə ilk kosmik səfərdir.

Altı iştirakçının olduğu kapsul təxminən 10-12 dəqiqə çəkən qısa suborbital səyahətdən sonra uğurla yerə enib. Uçuş zamanı iştirakçılar bir neçə dəqiqə ərzində çəkisizlik hissini yaşayıb və kosmosun qaranlığı fonunda Yeri müşahidə edə biliblər.