İngiltərə Premyer Liqası: "Çelsi" səfərdən üç xalla qayıdır

İngiltərə Premyer Liqasının 12-ci turunda "Lester Siti" və "Çelsi" qarşılaşıb.

Oxu.Az xəbər verir ki, Lesterdəki "Kinq Pauer" stadionunda baş tutan oyun qonaqların 1:2 hesablı qələbəsi ilə başa çatıb.

Qarşılaşmada hesabı 15-ci dəqiqədə "zadəganlar"ın hücumçusu Nikolas Cekson açıb. Bu qol ilk hissədə yeganə olub. Enzo Fernandes 75-ci dəqiqədə fərqi artırıb. 90+5-ci dəqiqədə isə meydan sahiblərinin hücumçusu Cordan Ayyu penaltidən bir qolun əvəzini çıxıb.

Hazırda "Çelsi" İngiltərə Premyer Liqasının turnir cədvəlində 3-cü yerdədir. Komanda 12 matçda 22 xal toplayıb. "Lester Siti" isə 10 xalla 16-cıdır. Yarışa 11 oyundan sonra 28 xalla "Liverpul" başçılıq edir.