NASA-nın "Lusi" adlı kosmik aparatı Yupiterə doğru uçuş zamanı öyrənilməsi zəruri olan ikinci asteroidin yanından uğurla keçib. 989 milyon dollarlıq bu aparat 20 aprel tarixində Mars və Yupiter arasında yerləşən "Donaldcohanson" adlı asteroidi yaxın məsafədən müşahidə edib və onun əvvəl hesab edildiyindən fərqli olduğu ortaya çıxıb.
Oxu.Az bu barədə "ScienceAlert" nəşrinə istinadla xəbər verib.
Araşdırma göstərib ki, "Donaldcohanson" da əvvəlki asteroid "Dinkineş" kimi "kontakt-ikili" asteroiddir, yəni iki asteroidin toqquşması nəticəsində yaranıb və bu quruluş ona uzunsov forma verir.
"Donaldcohanson"un uzunluğu təxminən 8 km, eni isə 3,5 km-dir. Alimlər bu asteroidin mürəkkəb geoloji quruluşa sahib olduğunu bildiriblər və onun öyrənilməsi Günəş sistemində planetlərin yaranmasına səbəb olan proseslər haqqında məlumat verə bilər.
"Lusi" əsas hədəfi olan Yupiterin troya asteroidlərinə doğru yoluna davam edir. Bu asteroidlər Günəş ətrafında Yupiterlə eyni orbitdə fırlanır və Günəş sisteminin ən erkən dövrü haqqında dəyərli məlumatlar daşıyır. "Lusi" bu asteroidlərin birincisi olan "Evribat" ilə 2027-ci ilin avqustunda qarşılaşacaq və 2033-cü ilə qədər daha 7 asteroidə yaxınlaşacaq.
Qeyd edək ki, aparat və asteroid adlarını tanınmış paleoantropoloq Donald Cohanston və onun 1974-cü ildə kəşf etdiyi, insan təkamülündə mühüm rol oynamış "Lusi" adlı avstralopitekdən alıblar.
