Qoxular əhvali-ruhiyyə və əmək qabiliyyətinə necə təsir edir?

"Qoxular insan həyatında ilk baxışdan göründüyündən daha mühüm rol oynayır. Onlar əhvali-ruhiyyəyə, konsentrasiyaya, yaddaşa və hətta əmək qabiliyyətinə təsir göstərir".

Oxu.Az xəbər verir ki, bunu rusiyalı nevroloq Qalina Çudinskaya "İzvestiya"ya bildirib.

Mütəxəssisin fikrincə, qoxular müxtəlif təsirlərə malikdir. Məsələn, limon, rozmarin, nanə, reyhan, adaçayı və evkalipt qoxuları konsentrasiyanı artıra və zehni fəaliyyəti aktivləşdirə bilər. Kəklikotu, lavanda və melissa kimi aromatlar isə əksinə, stresin səviyyəsini azaldaraq və əhval-ruhiyyəni yaxşılaşdıraraq, rahatlaşmağa kömək edir.

"2017-ci ildə Cənubi Federal Universitetində aparılan maraqlı bir araşdırma, portağal efir yağının qoxusunun qısamüddətli vizual yaddaşı əhəmiyyətli dərəcədə yaxşılaşdıra biləcəyini göstərdi. Portağal ətiri beynin müəyyən strukturlarını aktivləşdirir ki, bu da məlumatın daha yaxşı yadda saxlanmasına kömək edir. Düzdür, bu müalicə metodu Altsheymer kimi xəstəliklərdə kömək etmir, lakin yaddaşı gücləndirmək üçün əlavə stimul kimi faydalı ola bilər", - Çudinskaya qeyd edib.

Nevroloq əlavə edib ki, məktəblilər və tələbələr üçün sinif otaqlarında sitrus və ya nanə kimi stimullaşdırıcı qoxuların istifadəsi mənimsəməni yaxşılaşdıra bilər, istirahət yerlərində isə rahat və sakit atmosfer yaratmaq üçün rahatlaşdırıcı aromalardan istifadə etmək yaxşı olar.

Eyni zamanda, o qeyd edib ki, qoxu qabiliyyətinin itməsi - anosmiya təkcə fiziki narahatlığa deyil, həm də əhəmiyyətli stresə çevrilə bilər.

Xatırladaq ki, 27 fevral anosmiya barədə maarifləndirmə günüdür.