ABŞ Afrika və dünyanın digər regionlarının real ölçülərini daha dəqiq əks etdirən "Equal Earth" xəritə proyeksiyasını dəstəkləyən BMT Baş Assambleyasının qətnamə layihəsinin əleyhinə səs verən yeganə ölkə olub.
Oxu.Az bu barədə TASS agentliyinə istinadən xəbər verir.
Sənədin lehinə 164 dövlət səs verib. Daha altı ölkə - Ukrayna, Moldova, Gürcüstan, Serbiya, Litva və Estoniya - bitərəf qalıb.
Səsvermədən əvvəl ABŞ-nin BMT-dəki nümayəndəsi sənədin tamamilə rədd edilməsinə çağırıb. O bildirib ki, Vaşinqton bu təşəbbüsü xəritələrdəki təhrifləri aradan qaldırmağa yönəlmiş neytral cəhd kimi deyil, daha geniş "ideoloji gündəliyin" bir hissəsi kimi qiymətləndirir.
ABŞ tərəfi həmçinin belə qətnamələrin BMT-nin diqqətini beynəlxalq sülh, rifah və dövlətlərarası münasibətlər məsələlərindən yayındırdığını bildirib.
Birləşmiş Millətlər Təşkilatında cümə günü Merkator proyeksiyasının Afrikanın daha dəqiq təsvir edildiyi xəritə ilə əvəz olunması barədə qətnamə səsverməyə çıxarılacaq. Bu təklifə Afrika İttifaqına daxil olan 54 ölkə tərəfindən dəstək verilib.
Oxu.Az xəbər verir ki, bu məlumat BMT Baş Assambleyasının sənədlərində yer alıb.
Vurğulanmalıdır ki, BMT Baş Assambleyasının qətnamələrinin icrası hüquqi baxımdan məcburi deyil, lakin müsbət səsvermə nəticəsində tədris proqramları və müvafiq texnologiyalar yenilənə bilər.
