Rusiyada 2-ci Qərb Dairə Hərbi Məhkəməsində keçirilən məhkəmə prosesi zamanı dövlət ittihamı nümayəndələri bəyan ediblər ki, "Crocus City Hall" konsert zalında törədilən terror aktının dörd birbaşa iştirakçısı da daxil olmaqla, təqsirləndirilən şəxslərin günahı iş materialları əsasında tam şəkildə təsdiqlənib. 2024-cü ilin mart ayındakı faciə nəticəsində 149 nəfər həlak olmuşdu.
Oxu.Az-ın TASS-a istinadən xəbərinə görə, bu barədə zərərçəkmiş tərəfin maraqlarını müdafiə edən vəkil Lyudmila Ayvar məlumat verib.
"Prokurorun mövqeyinə əsasən, məhkəmənin sonunda onlardan heç biri özünü tam olaraq təqsirli bilməsə də, təqsirləndirilən şəxslərin cinayət əməlləri iş üzrə toplanmış dəlillərlə tam təsdiqini tapıb", - deyə hüquqşünas qeyd edib.
Onun sözlərinə əsasən, hazırda qapalı rejimdə keçirilən iclasda fasilə verilib və çıxışlar günün ikinci yarısında davam etdiriləcək. Axşama doğru təqsirləndirilən şəxslər üçün cəza müddətlərinin istənilməsi gözlənilir. Zərərçəkənlərin müdafiəsi ömürlük həbs cəzasının verilə biləcəyi 19 fiqurant barəsində ən sərt hökmün çıxarılmasını tələb edir.
