Ermənistanın Baş Prokurorluğu baş nazir Nikol Paşinyanın həyat yoldaşı Anna Akopyanın sosial şəbəkələrdə ona ünvanlanan təhdidlərlə bağlı müraciəti əsasında icraata başlayıb.
Oxu.Az Ermənistan KİV-ə istinadən xəbər verir ki, bu barədə ölkənin Baş Prokurorluğu məlumat yayıb.
Anna Akopyan bildirib ki, ailədaxili zorakılıq halları ilə bağlı ictimai müzakirələrdən sonra sosial şəbəkələr vasitəsilə ona təhdidlər gəlməyə başlayıb və bu səbəbdən öz təhlükəsizliyi ilə bağlı narahatlıq keçirir. O, dövlət qurumlarının onu qoruya biləcəyinə ümid etdiyini də ifadə edib.
Akopyan həmçinin qadınları psixoloji, fiziki və cinsi zorakılıq halları barədə açıq danışmağa çağırıb. Onun sözlərinə görə, bu problem siyasi baxışından, təhsil səviyyəsindən və sosial statusundan asılı olmayaraq bütün qadınlara aiddir.
Baş Prokurorluq müraciət əsasında icraata başlanıldığını təsdiqləsə də, araşdırmanın detalları ilə bağlı əlavə məlumat verməyib.
