Fransanın xarici işlər naziri Jan-Noel Barro İran İslam İnqilabı Keşikçiləri Korpusunu (SEPAH) Avropanın müxtəlif ölkələrindəki mağazaların soyuducu sistemlərinin sıradan çıxmasına səbəb olan haker hücumlarında iştirak etməkdə ittiham edib. O, İranın müvəqqəti işlər vəkilinin Fransa Xarici İşlər Nazirliyinə çağırıldığını da bildirib.
Oxu.Az "Reuters" agentliyinə istinadən xəbər verir ki, nazir bu hadisənin İran üçün nəticələri olacağını və İslam Respublikasına qarşı Avropa İttifaqı səviyyəsində sanksiyaların tətbiq ediləcəyini vəd edib.
"Le Figaro" qəzetinin daha əvvəl yaydığı məlumata görə, Fransa kəşfiyyatı oktyabrın 11-dən 12-nə keçən gecə baş verən bir sıra kiberhücumların ən azı bir qisminin SEPAH-ın rəqəmsal bölməsi ilə əlaqəli olduğunu düşünür. Hadisə ilə bağlı Paris prokurorluğu artıq araşdırmaya başlayıb.
Xatırladaq ki, oktyabrın 11-dən 12-nə keçən gecə Fransanın müxtəlif bölgələrində yüzlərlə supermarket haker hücumuna məruz qalıb. Nəticədə mağazaların soyuducu sistemlərinin fəaliyyəti pozulub və orada saxlanılan ərzaq məhsulları yararsız hala düşüb.
Bəzi mağazalar yüz minlərlə avro məbləğində zərərə uğradıqlarını bildiriblər. Ölkə üzrə ümumi zərərin isə milyonlarla avro təşkil edə biləcəyi ehtimal olunur.
Noyabrın 2-də Avropa İttifaqının daha 10-dan çox ölkəsində də oxşar insidentlər qeydə alınıb.
