İsrail hakimiyyəti Qəzza zolağında Fələstinin radikal HƏMAS hərəkatına qarşı quru əməliyyatlarını bərpa etməyi planlaşdırmır. Buna səbəb İrana və "Hizbullah" yaraqlılarına qarşı mümkün zərbələr üçün raketlərə qənaət edilməsidir.
Oxu.Az-ın xəbərinə görə, bu barədə İsrailin "I24" telekanalı mənbələrə istinadən məlumat verib.
"Hazırda HƏMAS-a (mövqelərə) atılan hər bir raket İrana və ya "Hizbullah"a (şiə hərəkatının mövqelərinə) zərbə endirmək üçün kifayət etməyə bilər", - deyə adı açıqlanmayan İsrail məmuru telekanala bildirib.
Telekanalın həmsöhbətləri qeyd ediblər ki, İsrail hakimiyyəti "təhdidlərin prioritetləşdirilməsi" prinsipinə riayət edir. Yayım orqanının məlumatına görə, silahlarını yerə qoymaqdan imtina etmələrinə və atəşkəs sazişi qüvvəyə mindikdən sonra hərəkatın anklavda mövqeyini gücləndirməsinə baxmayaraq, İsrail yaxın gələcəkdə HƏMAS radikallarına zərbə endirməyi planlaşdırmır.
İsrail rəsmiləri əmindirlər ki, hazırda hərəkat diqqətini silah ehtiyatlarının artırılmasına deyil, Qəzza zolağında humanitar yardımın paylanmasına cəmləyib.
Xatırladaq ki, 2025-ci il oktyabrın 9-da İsrail və HƏMAS Misir, Qətər, ABŞ və Türkiyənin vasitəçiliyi ilə ABŞ lideri Donald Trampın təqdim etdiyi sülh planının birinci mərhələsini həyata keçirmək barədə razılığa gəliblər. Növbəti gün Qəzza zolağında atəşkəs rejimi qüvvəyə minib.
