Pentaqon Avropada yerləşən ABŞ hərbi kontingentinin dislokasiya effektivliyini artırmaq məqsədilə xüsusi yoxlamalara start verib.
Oxu.Az xəbər verir ki, bu barədə ABŞ hərb nazirinin siyasi məsələlər üzrə müavini Elbric Kolbi məlumat yayıb.
"Bu gün Hərb Nazirliyi Avropadakı qüvvələrin yerləşdirilməsinin nəzərdən keçirilməsinə başlayıb. Bu barədə nazir Pit Heqset NATO ölkələrinin müdafiə qurumları rəhbərlərinin Brüsseldə keçirilən son görüşündə elan etmişdi. Nazirin o zaman bildirdiyi kimi, bu, Avropanın qeyri-nüvə silahları vasitəsilə öz müdafiəsini təmin etmək üçün əsas məsuliyyəti sürətli və geri dönüşü olmayan şəkildə öz üzərinə götürməsinə yönəlmiş reallığa əsaslanan bir yoxlama olacaq", - deyə Kolbi "X" hesabında qeyd edib.
Onun sözlərinə görə, həyata keçirilən bu təftiş ABŞ-nin əvvəllər dərc edilmiş milli müdafiə və milli təhlükəsizlik strategiyalarının əsas müddəaları ilə üst-üstə düşəcək.
Pentaqon rəhbərinin müavini vurğulayıb ki, yoxlamanın nəticələrinə əsasən, ABŞ qoşunlarının Avropadakı yerləşməsinə dair gələcək fəaliyyət üçün bir sıra variantlar təqdim ediləcək. O qeyd edib ki, bu potensial addımlar xüsusilə strateji hesablamalar, eləcə də hərbi və geosiyasi reallıqların aydın dərk edilməsi ilə şərtləndiriləcək. Kolbi əlavə edib ki, Birləşmiş Ştatlar bu məsələlərlə bağlı Avropadakı müttəfiqləri ilə məsləhətləşmələri davam etdirəcək.
