ABŞ Prezidenti Donald Tramp İrana qarşı təktərəfli sanksiyaları nəzərdə tutan fövqəladə vəziyyət rejimini bir il müddətinə uzadıb.
Oxu.Az xəbər verir ki, bu barədə Trampın Federal Reyestrdə yerləşdirilən bəyanatında deyilir.
Bəyanatda qeyd olunur ki, Birləşmiş Ştatların İranla münasibətləri hələ normallaşmayıb və 19 yanvar 1981-ci il tarixli ikitərəfli sazişlərin yerinə yetirilməsi prosesi davam edir.
Söhbət ABŞ və İran arasındakı Əlcəzair sazişlərindən gedir. Onlar 1979-cu il inqilabından sonra bir ildən çox Tehranda girov kimi qalan ABŞ diplomatlarının azad edilməsinə səbəb olub.
"Bu səbəbdən 14 noyabr 1979-cu ildə elan edilmiş milli fövqəladə vəziyyət rejimi, eləcə də həmin vaxt bu fövqəladə vəziyyətə əks-təsir məqsədilə tətbiq edilmiş tədbirlər 14 noyabr 2025-ci ildən sonra da qüvvədə qalmalıdır", - deyə bəyanatda vurğulanır.
