Ukrayna Prezidenti Volodimir Zelenski Rusiyanın atəşkəs barədə mayın 12-də qəbul edəcəyi qərardan asılı olmayaraq, İstanbula səfər edəcək.
Oxu.Az-ın məlumatına görə, bu barədə məlumatı "Axios" nəşri Ukrayna rəsmisinə istinadən yayıb.
Bildirilir ki, Rusiya 12 maydan etibarən atəşkəsə razılıq verməsə belə, Zelenskinin 15 may tarixində İstanbula səfəri baş tutacaq.
Ukrayna lideri daha əvvəl "Telegram" kanalında paylaşım edərək, ölkəsinin mayın 12-dən etibarən tam və uzunmüddətli atəşkəsin başlanmasını gözlədiyini bildirmişdi. O, bu atəşkəsin diplomatik prosesə zəmin yaradacağını vurğulamış və Rusiya Prezidenti Vladimir Putini 15 mayda Türkiyədə şəxsi görüşə çağırmışdı.
Qeyd edək ki, danışıqların bərpası və 15 mayda Moskva ilə Kiyev arasında görüşün keçirilməsi təklifini Rusiya Prezidenti Vladimir Putin mayın 11-də yerli və xarici jurnalistlərlə görüşü zamanı səsləndirib. O, dialoqun ilkin şərtlər olmadan başlanmalı olduğunu bildirib və mümkün danışıqların real atəşkəs razılaşması ilə nəticələnə biləcəyini istisna etməyib.
Bundan sonra ABŞ Prezidenti Donald Tramp Zelenskini dərhal danışıqlara başlamağa çağırıb.
