Ukraynanın Kiyev vilayətində, Petropavlivska Borshchahivka kəndində yerli sakinlər hərbi hissədən qaçmış əsgərlərin saxlanıldığı iddia edilən fərdi evin pəncərələrini kərpiclə vuraraq sındırıblar.
Oxu.Az UNIAN agentliyinə istinadən xəbər verir ki, hadisə zamanı sakinlərlə polis arasında qarşıdurma yaranıb. Polis əməkdaşları gözyaşardıcı qazdan istifadə ediblər.
Xatırladaq ki, noyabrın 2-də Ukrayna mediasında Kiyev yaxınlığındakı fərdi evin zirzəmisində silahlı şəxslərin təxminən 40 nəfəri saxladığı barədə məlumat yayılıb.
Daha sonra polis evdə Ukrayna Milli Qvardiyasının hərbçilərinin yerləşdirildiyini rəsmən açıqlayıb. Milli Qvardiyanın komandanı Aleksandr Pivnenko xəstəxanaya yerləşdirilən dörd nəfərin hərbi hissədən qaçmış hərbçilər olduğunu bildirib.
O, həmçinin evin ərazisində səfərbərlik çərçivəsində orduya cəlb edilmiş şəxslərin də saxlanıldığını təsdiqləyib.
