Legioner limitini ləğv etdik, bəs yerli futbolçuları nə gözləyir?

Anar Həsənov yazır...

Azərbaycan futbolunda yeni eraya start verilir. Legioner limitinin ləğvi yerli futbolçuların mübarizəsinə səbəb olacaq.

Klubların büdcələrinə nəzər yetirsək bu məsələ ən çox "Qarabağ", "Neftçi" və "Sabah" üçün ideal sayıla bilər. Buna səbəb isə Avrokuboklarda ölkəmizi təmsil edən komandalarımız bu dəfə daha güclü heyətlə meydana çıxa və daha uğurlu nəticələrə imza ata bilərlər. Amma, bu qərar futbolsevərləri iki hissəyə ayırdı.

Belə ki, futbol azarkeşlərinin böyük hissəsi legioner limitinin ləğvini yerli futbolçuların gələcəyinə təsir edəcəyini vurğulasa da geri qalan hissə isə yerli futbolçuların əsas heyətə düşə bilməsi üçün daha çox çalışmalı olacağını və daha çox əziyyət çəkməli olduqları üçün inkişaf etmək məcburiyyətində qalacağını düşünür.

Maddi durumu yüksək ola klublar legionerləri cəlb edərkən "Şamaxı", "Kəpəz" və "Səbail" kimi klublar isə sadəcə yerli futbolçulara üz tutmalı olacaqlar.

Digər aktual və önəmli məsələ isə klub sayının artımıdır. Klub sayının artımı mövzusu əlbəttə ki Azərbaycan futbolunun bölgələrdəki inkişafı üçün ən mühüm addımlardan biri sayılır.

Lakin, burada maraqlı sual yaranır ki, Premyer Liqaya yüksələcək komandalarda infrastruktur mövzusu müzakirə olunubmu?

Hazırda I Liqada mübarizə aparan "Qəbələ" klubundan başqa Premyer Liqaya yüksələcək komandalardan hansında keyfiyyətli stadion var?

Komanda sayının artırılması yeni sponsorla müqavilə imzalayan "Mingəçevir" klubunun elita səviyyəsinə yüksəldilməsi üçün atılan bir addımdırsa, idman prinsipləri nə üçün lazımdır?

Bu sualların cavabı isə yalnız növbəti iclasdan sonra bəlli olacaq. Çünki növbəti iclasda elitaya yüksələcək komandalar bəlli olacaqlar, Premyer Liqada autsayder mövqeyində qərarlaşan komandanın elitanı tərk edib-etməyəcəyi açıqlanacaq.

Uzun illərdir Azərbaycan futbolunun inkişafını gözləyən futbolsevərlər növbəti iclasın keçirilməsini və qəbul ediləcək qərarları çox böyük həvəs və maraqla gözləyirlər. Çünki, region klubları Premyer Liqaya yüksələcəyi təqdirdə azarkeş sayında və bölgələrdə futbola olan maraqda ciddi artım müşahidə etmək mümkün olacaq. Nəzərə alsaq ki, hazırda elitada mübarizə aparan 10 komandadan 6-sı Bakıda yerləşir və bölgələrimizdə yaşayan futbol sevərlər oyunları izləməyə gələ bilmir, bu onlar üçün sevindirici xəbər olacaq.

Əsasən də ümid edək ki, "Araz-Naxçıvan" adını daşıdığı Naxçıvana geri qayıdacaq və orada mübarizə aparacaq. "Qəbələ" yenidən elitaya qayıdacaq, onunla birlikdə isə infrastruktur gücünə malik olan daha iki komanda da bu sıralara qoşulacaq.

Legioner limitinin ləğvi hərçənd ki, yerli futbolçularımız üçün çox ciddi problem sayılsa da, hər şey insanın öz əlindədir düşüncəsi ilə yanaşmalıyıq.

Daha əvvəllər legioner limitinin ləğvi olmadığı üçün yerli futbolçularımız rahat davranır, əsas heyətdən kənarda qalmaqdan çəkinmirdilər. Çünki, məşqçilər yerli futbolçulara üstünlük verməli olurdular. Yeni mövsümdən etibarən isə yerli futbolçular əsas heyətdə yerlərini tuta bilmək üçün sözün əsil mənasında mübarizə aparmalı olacaqlar. Əsas heyətə düşə bilməyən futbolçular isə milliyə dəvət almasalar bəlkə Azərbaycan millisinin heyətində də ciddi dəyişikliklər olar və uğurlu nəticələr əldə edə bilərik.

AFFA-nın baş bilənləri yeni futbol erasının başlanğıcı üçün çox ciddi addımlar atdılar. Bu addımlar Azərbaycan futbolunun gələcəyinə işıq saça bilər, lakin qoyulan hədəflərə və yazılan qanunlara ciddi riayət olunarsa. Əks halda isə bu yazılanlar və deyilənlər elə söz olaraq da qalacaq.

Azərbaycan futbolunun keçmişinə baxsaq aydın şəkildə görə bilərik ki, nailiyyəti olan klublarımız bunu hər zaman legioner hesabına ediblər. Aydın məsələdir ki, legionerlərin keyfiyyətini bəyənən keçmiş AFFA rəhbərliyi də onları milliləşdirmək qərarına gəlirdilər.

Legioner limitini ləğv etdik, klub sayını artırdıq, bəs, Azərbaycan millisi üçün nə işlər gördük və ya görəcəyik?

Legionerlərin limitini ləğv etsək və meydanda sadəcə kənardan gələn futbolçular olarsa millinin baş məşqçisi heyətə kimi, necə dəvət edəcək?

Hərçənd ki, bu suallara cavab almaq üçün AFFA-nın İcraiyyə Komitəsinin növbəti iclasını gözləməliyik. Ümid edək ki, Azərbaycan futbolu gələcəkdə UEFA Millətlər Liqasının D qrupunda yox, Avropa Çempionatında iştirak hüququ əldə edər. Yerli çempionatın inkişafını düşünürüksə millimizin uğurlarını ondan daha çox düşünməliyik.