Mərakeş yığmasının DÇ-2026-nın 1/4 finalında məğlubiyyətindən sonra Londonda təhlükəsizlik tədbirləri artırılıb.
Oxu.Az xəbər verir ki, bu barədə "Mirror" nəşri məlumat yayıb.
Azarkeşlər arasında yaranan qarşıdurmalar səbəbindən xüsusi qoruyucu geyimli polis əməkdaşları Britaniya paytaxtının küçələrində asayişin bərpasına cəlb ediliblər.
Qeyd edək ki, Mərakeş komandası Fransaya 0:2 hesabı ilə uduzub. Oyun başa çatdıqdan sonra azarkeşlərin böyük qrupları Londonun şimal-qərb hissəsində yerləşən məşhur Ecver-roud küçəsinə toplaşıblar.
Sosial şəbəkələrdə tərəfdarlar arasındakı toqquşmaları əks etdirən kadrlar yayılıb. Hadisə yerində çox sayda təcili yardım və xilasetmə xidməti işçiləri cəmləşib.
Məlumata görə, hələ matçın fasiləsi zamanı küçələrdə asayişin pozulması halları başlayıb: azarkeşlər fişənglər atıblar. Bəzi fanatlar nəqliyyatın hərəkətini dayandırıb, sədlərin üzərinə çıxaraq Mərakeş bayraqlarını dalğalandırıblar.
Görüntülərin birində yerdə uzanan polis əməkdaşı nəzərə çarpır, onun yanında isə təcili xidmət işçiləri fəaliyyət göstərir. Mətbuatın məlumatına əsasən, o, bədən xəsarətləri alıb. Həmçinin, baş vermiş insidentlə əlaqədar bir neçə nəfərin saxlanıldığı bildirilir.
