Rusiyanın "Ximki" və "Alaniya" futbol klubları arasında keçirilən matçla bağlı rüşvət almaqda təqsirləndirilən futbol hakimi Andrey Fisenko əvvəlki ifadəsindən imtina edib və özünü təqsirli bilmədiyini bəyan edib.
Oxu.Az "Kommersant" nəşrinə istinadən xəbər verir ki, bu barədə Rusiya Daxili İşlər Nazirliyinin rəsmi nümayəndəsi İrina Volk məlumat verib.
Onun sözlərinə görə, Andrey Fisenko ifadəsini süni intellektin tövsiyəsi əsasında dəyişib. Bildirilir ki, süni intellekt hakim üçün müdafiə mövqeyi də hazırlayıb.
Volk qeyd edib ki, ilkin dindirmə zamanı təqsirləndirilən şəxs təqsirini tam etiraf edib və peşman olduğunu bildirib. Lakin sonradan o, ifadəsini dəyişib. Hüquq-mühafizə orqanlarının əməkdaşları onun mobil telefonuna baxış zamanı bu addımı süni intellektin tövsiyəsi ilə atdığına dair məlumat əldə ediblər.
Xatırladaq ki, hakimin saxlanılması barədə 2026-cı ilin martında məlumat verilmişdi. İstintaqın versiyasına görə, 2023-cü ilin noyabrında "Ximki" FK-nın rəhbərliyi "Alaniya" ilə keçirilən matçın baş hakiminə iki milyon rubl rüşvət verib. Həmin görüş "Ximki"nin 4:1 hesablı qələbəsi ilə başa çatıb.
Hakimlə birlikdə vasitəçi qismində çıxış etdiyi iddia olunan şəxs də saxlanılıb. Onların hər ikisi barəsində əvvəlcə başqa yerə getməmək haqqında iltizam qətimkan tədbiri seçilsə də, daha sonra hakim həmin qətimkan tədbirinin şərtlərini pozduğu üçün ev dustaqlığına göndərilib.
