Azərbaycan Respublikası Mədəniyyət Nazirliyi tərəfindən dövlət teatrlarının idarəetmə sisteminin təkmilləşdirilməsi istiqamətində atılan addımlar cəmiyyətdə geniş müzakirələrə səbəb olub.
Oxu.Az xəbər verir ki, xüsusilə dövlət teatrlarında baş rejissor və baş rəssam ştatlarının ləğv edilməsi məsələsi ictimai maraq doğurub və bir sıra sualların ortaya çıxmasına səbəb olub.
Teatr sistemində hansı dəyişikliklərə başlanılıb, bu islahatların əsas məqsədi nədir və yeni idarəetmə modeli yaradıcılıq prosesinə necə təsir göstərəcək, ləğv olunan ştatlarda çalışan şəxslərin taleyi necə olacaq? Bu islahatlar ixtisar və ya kütləvi ştat azaldılması deməkdirmi?
Mədəniyyət Nazirliyinin Mətbuat Xidmətindən Oxu.Az-ın sorğusuna cavab olaraq bildirilib ki, Azərbaycanda dövlət teatrlarının idarəetmə sistemində əsaslı islahatlara start verilib. Aparılan dəyişikliklər çərçivəsində teatrların əsasnamələri, idarəetmə strukturları və ştat cədvəlləri yenilənərək müasir idarəetmə prinsiplərinə uyğunlaşdırılıb.
"İslahatların əsas məqsədi dövlət teatrlarında idarəetmə mexanizmlərini daha səmərəli, çevik və şəffaf etmək, qərar qəbuletmə prosesini təkmilləşdirmək və yaradıcılıq potensialının daha effektiv şəkildə reallaşdırılmasına şərait yaratmaqdır. Yeni yanaşma ilə idarəetmədə məsuliyyət bölgüsünün aydınlaşdırılması və kollektiv qərar mexanizmlərinin gücləndirilməsi hədəflənir", - deyə məlumatda bildirilir.
Aparılan islahatlar çərçivəsində baş rejissor, baş rəssam, bədii rəhbər və digər oxşar vəzifələrin yeni strukturda nəzərdə tutulmaması ilə bağlı qeyd olunub ki, bu qərar vəzifələrin formal mövcudluğundan deyil, onların funksional effektivliyindən çıxış edilərək qəbul edilib, həmin vəzifələrin funksiyaları daha çevik və nəticəyönümlü idarəetmə modeli çərçivəsində yenidən bölüşdürülüb:
"Ləğv olunan vəzifələrin funksiyalarının necə icra olunacağına gəlincə isə qeyd edirik ki, həmin funksiyalar kollegial idarəetmə prinsipləri əsasında və yeni yaradılmış struktur bölmələri vasitəsilə həyata keçiriləcək. Məqsəd qərarların bir nəfər üzərində cəmlənməsi deyil, kollektiv məsuliyyət və aydın funksional bölgü mexanizminin formalaşdırılmasıdır".
Teatrlarda ləğv olunan bölmələrin yerində hansı yeni struktur bölmələri yaradılması məsələsi də müzakirə olunan əsas məsələlər siyahısındadır.
Nazirliyin Mətbuat Xidməti bu məsələyə münasibətdə bildirib ki, yenilənmiş strukturda teatrların fəaliyyətinin daha sistemli təşkili üçün strategiya və kommunikasiya şöbəsi, yaradıcı şöbə, artist heyətinin idarəedilməsi və digər funksional bölmələr yaradılıb ki, bu bölmələr teatrın həm yaradıcılıq, həm də təşkilati fəaliyyətinin daha effektiv idarə olunmasına xidmət edir:
"Hazırda bədii rəhbər vəzifəsində çalışan şəxslərin fəaliyyətlərini necə və harada davam etdirməsi də ən çox verilən suallar arasındadır. Bildirmək istərdik ki, teatrların bədii rəhbər vəzifələrində çalışan şəxslər yeni struktur çərçivəsində fəaliyyətlərini davam etdirə bilərlər. Onlar teatr direktorlarının təqdimatı və təsdiqi ilə quruluşçu rejissor, yaradıcı şöbə müdiri və ya digər müvafiq vəzifələrə təyin oluna bilərlər.
"Bu islahatları ixtisar və ya kütləvi ştat azaldılması kimi dəyərləndirmək olarmı və təqdim olunan yeni idarəetmə modeli teatrların yaradıcılığına necə təsir edəcək?" sualına gəlincə isə qeyd olunub ki, aparılan islahatlar heç bir halda ixtisar və ya kütləvi ştat azaldılmasına yol açmır.
"Çünki islahatların məqsədi hər hansı ştatın mexaniki şəkildə ləğvi deyil. Əsas hədəf effektiv işləməyən və ya zəif fəaliyyət göstərən idarəetmə mexanizmlərinin müasir tələblərə uyğun şəkildə yenilənməsidir. Yeni model teatrların yaradıcılıq potensialını artırmaq, yaradıcılıq azadlığını daha sağlam institusional çərçivədə təmin etmək və idarəetmədə məsuliyyət bölgüsünü aydınlaşdırmaq məqsədi daşıyır. Bu yanaşma teatrların həm yaradıcılıq, həm də idarəetmə baxımından daha dayanıqlı inkişafına zəmin yaradır", - deyə məlumatda vurğulanıb.
Əzizə İsmayılova
