ABŞ Prezidenti Donald Tramp ölkəsinin 66 beynəlxalq təşkilatdan çıxmasına dair göstəriş verib.
Oxu.Az-ın xəbərinə görə, müvafiq bəyanat Ağ Evin saytında dərc edilib.
Məlumata görə, Tramp ABŞ-nin artıq ölkənin maraqlarına xidmət etməyən 66 beynəlxalq təşkilatdan çıxmasını əmr edib. Ağ Ev rəhbərinin sərəncamına əsasən, ABŞ-nin bütün federal qurumları BMT-nin 31 strukturunun və bu qurumdan kənar 35 təsisatın işində və maliyyələşdirilməsində iştirakını dayandırmalıdır.
"Bu təşkilatların çoxu radikal iqlim siyasətini, qlobal idarəetməni və ABŞ-nin suverenliyinə və iqtisadi gücünə zidd olan ideoloji proqramları təşviq edir", - deyə bəyanatda bildirilib.
Paylaşımda təşkilatların konkret siyahısı təqdim edilməyib.
Qeyd olunub ki, ABŞ vergiödəyiciləri beynəlxalq təşkilatların maliyyələşdirilməsinə milyardlarla pul xərcləyiblər, lakin bunun müqabilində çox az fayda əldə ediblər.
Ağ Evin Mətbuat xidməti həmçinin xatırladıb ki, Donald Trampın ikinci prezidentlik müddətinin başlanğıcından bəri ABŞ artıq Ümumdünya Səhiyyə Təşkilatından (ÜST), Paris İqlim Sazişindən, BMT (Birləşmiş Millətlər Təşkilatı) İnsan Hüquqları Şurasından və Fələstin qaçqınlarına kömək üzrə BMT-nin Yaxın Şərq agentliyindən çıxıb.
