Avropa İttifaqı (Aİ) qurumun hüdudlarından kənarda yerləşən miqrant mərkəzlərinin maliyyələşdirilməsi üçün 20 milyard avro vəsait ayırmağı nəzərdə tutur.
Oxu.Az xəbər verir ki, bu barədə Böyük Britaniyanın "Financial Times" (FT) nəşri öz mənbələrinə istinadən məlumat yayıb.
Nəşrin xəbərinə görə, miqrasiya nəzarətinin autsorsinq edilməsi ilə bağlı qərar hələ tam təsdiqlənməsə də, Aİ rəhbərliyi bu proqramın maliyyələşdirilməsi müddəasını 2028-2034-cü illər üzrə büdcəyə daxil etməyi planlaşdırır. Bildirilir ki, 20 milyard avroluq bu məbləğ ittifaqın xarici siyasət büdcəsinin təqribən 10%-ni təşkil edəcək.
Aİ Şurasının daha əvvəl verdiyi məlumata əsasən, müzakirə olunan təkliflər paketi Avropa İttifaqından kənarda, buna razılıq verən dövlətlərin ərazisində miqrasiya düşərgələrinin yaradılması bəndini özündə ehtiva edir. Həmin düşərgələrdə Aİ ölkələrinin miqrasiya orqanlarından rədd cavabı alan şəxslər onların ittifaqdan çıxarılması ilə bağlı apellyasiya şikayətlərinə baxılmasını gözləyəcək və ya öz vətənlərinə göndərilməsi məsələsi həll olunana qədər orada qalacaqlar.
Yaxın həftələrdə sözügedən sənəd Aİ Şurasının iclasında və Avropa Parlamentinin sessiyasında hüquqi cəhətdən təsdiq edilməlidir. Qeyd edək ki, kompromis mətnin razılaşdırılmasından sonra bu addım sadəcə rəsmi prosedur xarakteri daşıyır.
