Tramp: "İsrail və İran arasındakı atəşkəs razılaşması qüvvədədir"

ABŞ Prezidenti Donald Tramp hesab etmir ki, İran və İsrail arasında əldə edilən atəşkəs işlək deyil.

Oxu.Az xarici KİV-ə istinadən xəbər verir ki, 80 yaşlı siyasətçi bu barədə jurnalistlərə verdiyi açıqlamada bildirib.

O, jurnalistin atəşkəsin pozulması ilə bağlı sualına "Mən belə düşünmürəm" deyə cavab verib.

Tramp bildirib ki, İsrail və İran arasındakı atəşkəs razılaşması qüvvədədir.

Onun sözlərinə görə, İsrail təyyarələrini geri çevirəcək və İrana zərbə endirməyəcək.

15:15

"Həm İsrail, həm də İran atəşkəsi pozub".

Oxu.Az "Reuters"ə istinadən xəbər verir ki, bu açıqlamanı Birləşmiş Ştatlar Prezidenti Donald Tramp verib.

ABŞ prezidenti hər iki ölkədən, xüsusən də İsraildən narazılığını bildirib.

"İsrail, bombalar atmayın. Əgər etsəniz, bu, ciddi pozuntu olacaq. Pilotlarınızı dərhal evə qaytarın!" - deyə Tramp vurğulayıb.

13:17

İranın Ali Milli Təhlükəsizlik Şurası bəyanat yayaraq İsraillə atəşkəsin qüvvəyə mindiyini açıqlayıb.

Oxu.Az bu barədə İran KİV-ə istinadən məlumat yayıb.

"İran Silahlı Qüvvələri düşmənlərinin sözlərinə inanmır və barmağını tətikdə saxlamaqda davam edir, istənilən yeni təcavüzə cavab verməyə hazırdır", - İranın Ali Milli Təhlükəsizlik Şurası bəyanatında qeyd olunur.

Bəyanatda, həmçinin, atəşkəsin əldə edilən hərbi uğurlar nəticəsində birtərəfli qaydada İsrailə qəbul etdirildiyi qeyd olunub.

12:47

İsrail ordusunun Baş Qərargah rəisi, general-leytenant Eyal Zamir atəşkəs razılaşmasının qüvvəyə minməsindən sonra İran tərəfindən həyata keçirilən hücumla əlaqədar təcili iclas keçirib.

Oxu.Az bu barədə İsrail KİV-ə istinadən məlumat yayıb.

O bildirib ki, İsrail bu atəşə görə İran İslam Respublikasına sərt cavab verəcək.

12:34

İran atəşkəs qərarından sonra İsrail ərazisinə heç bir yeni raketin atılmadığını bildirib.

Oxu.Az xəbər verir ki, məlumatı İranın dövlət mediası yayıb.

12:13

İsrailin müdafiə naziri İsrael Kats İranın atəşkəsi pozduğunu bəyan edib.

Oxu.Az TASS-a istinadən xəbər verir ki, o, orduya Tehrana güclü zərbələr endirməyi əmr edib.

"Mən İsrail ordusuna İranın atəşkəs rejimini pozmasına cavab olaraq Tehranın mərkəzindəki hökumət obyektlərinə yüksək intensivlikli zərbələr endirməyi əmr etmişəm", - deyə İsrailin müdafiə naziri vurğulayıb.

11:55

Hayfa və İsrailin şimalındakı digər ərazilərdə İranın hücumu ilə əlaqədar həyəcan siqnalları işə düşüb.

Oxu.Az xəbər verir ki, bu barədə İsrail mətbuatı məlumat yayıb.

Bildirilir ki, "Tseva adom" ("Qırmızı rəng" - İsrailin hava hücumundan xəbərdarlıq sistemi) sistemi həmçinin Qalileya və Colan təpələri ərazisində işə düşüb.

11:41

İsrail ordusu İrandan yeni raket atəşinə məruz qaldığını açıqlayıb.

Oxu.Az xəbər verir ki, bu barədə İsrailin ordusunun mətbuat xidməti məlumat yayıb.

10:41

İsrail Baş nazirinin ofisi İranla atəşkəsin əldə olunduğunu elan edib.

Oxu.Az İsrail KİV-ə istinadən xəbər verir ki, bu barədə İsrail Baş nazirinin ofisi bəyanat yayıb.

"Aparılan uğurlu hərbi əməliyyatların fonunda ABŞ Prezidenti Donald Trampla tam koordinasiyalı şəkildə İsrail ikitərəfli atəşkəs təklifi ilə razılaşıb", - İsrail Baş nazirinin ofisinin məlumatında qeyd olunur.

Bəyanatda qeyd olunur ki, İsrail atəşkəsin istənilən formada pozulmasına sərt şəkildə cavab verəcək.

09:08

İsrailə endirilən son raket zərbələrindən sonra rəsmi Tehran atəşkəsin qüvvəyə mindiyini açıqlayıb.

Oxu.Az xəbər verir ki, bu barədə İran mətbuatı məlumat yayıb.

Bildirilib ki, İran tərəfindən Bakı vaxtı ilə səhər saat 08:00-dən atəşkəs qüvvəyə minib.

08:46

İran çərşənbə axşamı səhər İsrailə azı 11 raket zərbəsi endirib.

Oxu.Az-ın xəbərinə görə, bu barədə "N12" telekanalı məlumat yayıb.

Məlumatlara görə, çərşənbə axşamı, iyunun 24-də İran iki saat ərzində yəhudi dövlətinin ərazisinə beş müxtəlif mərmi ilə ümumilikdə 11 raket atıb.

İsrail ordusu İran ərazisindən 6-cı raket buraxılışını qeydə aldığını bildirib.

07:53

İranın atdığı raketlərdən birinin İsrailin Beer-Şeva şəhərindəki binaya düşməsi nəticəsində ölənlərin sayı altıya çatıb.

Oxu.Az xəbər verir ki, bu barədə "Əl-Cəzirə" telekanalı İsrail təcili tibbi yardım stansiyasına istinadən məlumat yayıb.

Bildirilib ki, hadisə yerində xilasedicilər işləyirlər, azı 10 nəfər xəsarət alıb, dağıntılar altında qalanlar var.

07:26

İsrailin müxtəlif bölgələrində bir neçə partlayış baş verib, ölkənin cənubundakı Beer-Şevada bina raketlə vurulub.

Oxu.Az-ın xəbərinə görə, bu barədə "N12" telekanalı məlumat yayıb

Telekanalın məlumatına görə, zərbə nəticəsində ən azı üç nəfər həlak olub, bir neçə nəfər xəsarət alıb.

Öz növbəsində, SAXAL İrandan raket buraxılışının üçüncü dalğasını qeydə aldıqlarını açıqlayıb.

06:41

İsrailin Müdafiə Ordusu (IDF-SAXAL) İran tərəfindən yenidən raketlərin buraxıldığını bəyan edib.

Oxu.Az xəbər verir ki, İranın xarici işlər naziri Abbas Əraqçının hərbi əməliyyatların bitdiyini açıqlamasından bir neçə dəqiqə sonra IDF İsrail ərazisində hava hücumundan müdafiə sistemlərinin işə düşdüyünü bildirib.

06:12

İranın xarici işlər naziri Abbas Əraqçı ordunun hərbi əməliyyatları dayandırdığına işarə edib.

Oxu.Az xəbər verir ki, "X" hesabındakı paylaşımında A.Əraqçı hərbi əməliyyatların yerli vaxtla saat 4:00-a (Bakı vaxtı ilə 4:30) qədər davam etdiyini yazıb.

"Bütün iranlılarla birlikdə əziz ölkəmizi son damla qanına qədər müdafiə etməyə hazır olan, düşmənin istənilən hücumuna son dəqiqəyə qədər cavab verən igid Silahlı Qüvvələrimizə təşəkkür edirəm", - XİN rəhbəri qeyd edib.

Bundan öncə Əraqçı İsrailin yerli vaxtla saat 4:00-dək bir daha hücum etməyəcəyi təqdirdə əməliyyatların bitəcəyini demişdi.

04:33

"İran hakimiyyəti ABŞ-nin İsraillə atəşkəs təklifi ilə razılaşıb".

Oxu.Az bildirir ki, bu barədə İran rəsmisinə istinadən "Reuters" məlumat yayıb.

Digər mənbələr də agentliklər də bildiriblər ki, Qətərin Baş naziri Məhəmməd bin Əbdül Rəhman ABŞ Prezidenti Donald Trampın İsrailin atəşkəs razılaşmasına razılıq verdiyini bildirdikdən sonra Tehranı da Vaşinqtonun təklifini qəbul etməyə razı salıb.

Tramp İsrail və İran arasında atəşkəsin müddətsiz olmasını gözləyir.

"Məncə, atəşkəs müddətsiz olacaq. Bu, əbədi davam edəcək", - o "NBC News"a deyib.

ABŞ lideri müharibənin tamamilə bitdiyini və İsraillə İranın bir-birini bir daha atəşə tutacağına inanmadığını iddia edir.

Öz növbəsində, İsrailin Baş naziri Benyamin Netanyahu kabinet iclasından sonra nazirlərinə İranla atəşkəs və son hadisələr haqqında hələ ki danışmamağı tapşırıb.

İsrail mətbuatı da məlumatı təsdiqləyib. Qeyd edilib ki, kabinet iclası artıq başa çatıb və Netanyahu nazirlərdən gündəmi şərh etməməyi istəyib.

04:01

"İran barışıq və atəşkəslə bağlı heç bir təklif almayıb və bunun üçün heç bir səbəb görmür".

Oxu.Az bildirir ki, bu barədə CNN-ə adı açıqlanmayan yüksəkrütbəli iranlı məmur məlumat verib.

Onun sözlərinə görə, İran davamlı sülhə nail olana qədər mübarizəni davam etdirəcək, İsrail və ABŞ-nin şərtlərinə İslam Respublikasına qarşı hücumlara haqq qazandırmaq üçün hazırlanmış "aldatma" kimi baxacaq.

İran rəsmisi vurğulayıb: "Faktiki olaraq, düşmən İrana qarşı təcavüz edir və Tehran öz düşmənlərinin yalanlarına qulaq asmaq istəməyərək, cavab zərbələrini gücləndirmək ərəfəsindədir".

Eyni zamanda, "Reuters" yazır ki, Qətərin baş naziri İran hakimiyyətini ABŞ Prezidenti Donald Trampın İsraillə barışıq təklifi ilə razılaşmağa inandırmağa çağırıb.

24 iyun, 03:17

"İsrail və İran yaxın saatlarda atəşi tam dayandırmağa razılaşıblar".

Oxu.Az xəbər verir ki, bu barədə ABŞ lideri Donald Tramp "Truth Social"da yazıb.

"Hamını təbrik edirəm! İsrail və İran arasında tam və ümumi şəkildə razılaşdırılıb ki, təxminən 6 saat sonra, hər iki tərəf hazırda davam edən son missiyalarını başa çatdırdıqdan sonra tam və qəti atəşkəs elan ediləcək", - Tramp yazıb.

O qeyd edib ki, bu atəşkəs 12 saat davam edəcək, və bu müddətin sonunda müharibə rəsmi olaraq bitmiş hesab olunacaq:

"Rəsmi olaraq İran atəşkəsi başlayacaq və 12-ci saatda İsrail də atəşkəsə qoşulacaq. 24-cü saat tamam olanda isə 12 günlük müharibənin rəsmi sonu bütün dünya tərəfindən alqışlanacaq", - Tramp yekunlaşdırıb.