"NATO-ya üzv ölkələr ABŞ və İsrailə Hörmüz boğazının açılmasında və gəmilərin bu su yolundan keçidinin təhlükəsizliyinin təmin edilməsində yardım göstərməyə borclu deyillər".
Oxu.Az xəbər verir ki, bunu Türkiyənin ticarət naziri Ömər Bolat "Euronews" telekanalına müsahibəsində deyib.
Türkiyəli nazirinin sözlərinə görə, NATO ölkələri İranla bağlı münaqişə fonunda susmağa üstünlük veriblər, çünki İslam Respublikasına hücum edilib-edilməməsi məsələsində heç kim alyans üzvləri ilə məsləhətləşmə aparmayıb.
Bolat qeyd edib ki, NATO-ya üzv dövlətlər ABŞ və İsrailin İrana qarşı əməliyyatının qısamüddətli olacağını gözləyirdilər:
"Onlar özləri və qlobal iqtisadiyyat üçün son dərəcə mənfi nəticələri nəzərə almayıblar. Hesab edirdilər ki, bu əməliyyat yalnız İsrailin maraqları naminə həyata keçirilir, NATO-nun və ya bütün dünyanın xeyrinə deyil".
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
Həmçinin Hörmüz boğazından gəmilərin keçidində ciddi problemlər yaranıb.
