"Insilico Medicine" biofarmasevtika şirkəti tərəfindən süni intellektin tətbiqi ilə hazırlanmış "rentosertib" adlı eksperimental preparat xəstələrin bioloji yaşını azaltmaq xüsusiyyətini nümayiş etdirib. Əvvəlcə ağır ağciyər xəstəliyi olan idiopatik ağciyər fibrozunun müalicəsi üçün nəzərdə tutulan bu dərman vasitəsi 42 könüllü üzərində keçirilən klinik sınaqların ikinci mərhələsini uğurla başa vurub.
Oxu.Az xəbər verir ki, "Nature Biotechnology" jurnalında dərc edilən təhlilin nəticələri altı fərqli epigenetik metod əsasında iştirakçıların bioloji yaşının azaldığını göstərib. Qeyd etmək lazımdır ki, plasebo qrupunda bu cür müsbət dəyişikliklər qeydə alınmayıb.
Şirkətin baş direktoru Aleks Javoronkov vurğulayıb ki, ikili təyinatlı bu terapiya həm yaşla bağlı yaranan patologiyalara qarşı effektiv mübarizə apara, həm də insan ömrünü uzada bilər.
Mütəxəssislər bildirirlər ki, hazırkı məlumatlar hələlik ilkin xarakter daşıyır və preparatın uzunmüddətli təsirləri daha genişmiqyaslı yoxlanışlar tələb edir. GLP-1 kimi dərmanların uğuru fonunda böyük əczaçılıq şirkətlərinin cavanlaşdırıcı texnologiyalara və innovasiyalara marağı sürətlə artır.
