Yağan intensiv yağışlar Zaqatala rayonunun Vöhtala kəndinə ciddi ziyan vurub.
Oxu.Az xəbər verir ki, kəndin rayon mərkəzi ilə əlaqəsi kəsilib.
Kənddəki son vəziyyətlə bağlı görüntünü təqdim edirik:
Yağan intensiv yağışlar nəticəsində Zaqatala rayonunun bəzi ərazilərində və kəndlərində elektrik enerjisinin verilişində fasilələr yaranıb.
Bu məlumat Oxu.Az-ın sorğusuna cavab olaraq "Azərişıq" ASC-dən verilib.
Bildirilib ki, rayon mərkəzi və kəndlər də daxil olmaqla ümumilikdə yeddi elektrik xəttində problem yaranıb.
"Artıq beş xətdə yaranan problem aradan qaldırılıb. Hazırda hava şəraitinin yağıntılı olması bərpa işlərində müəyyən çətinliklər yaratsa da, qalan iki xətt üzrə elektrik enerjisinin verilişinin bərpası istiqamətində işlər davam etdirilir. Rayon mərkəzi ilə əlaqəsi kəsilən Vöhtala kəndində isə elektrik xətlərində hər hansı problem yoxdur. Kənd ərazisində sel sularının çox olması səbəbindən aidiyyəti qurumların tövsiyəsi ilə təhlükəsizlik baxımından elektrik verilişini dayandırmışıq. Müvafiq tədbirlər yekunlaşdıqdan sonra elektrik enerjisinin verilişi bərpa olunacaq", - deyə məlumatda vurğulanıb.
Yağan intensiv yağışlar Zaqatala rayonunda bir sıra fəsadlara səbəb olub.
Oxu.Az xəbər verir ki, hava şəraiti ilə əlaqədar iyulun 7-si axşam saatlarından başlayan güclü yağışlar iyulun 8-nə keçən gecə daha da intensivləşib.
Oxu.Az-ın sorğusuna cavab olaraq Zaqatala Rayon İcra Hakimiyyətindən bildirilib ki, hazırda yağıntılı hava şəraiti davam edir.
"Əsas ziyan kəndlərə dəyib. Şəhər ərazisində də müəyyən problemlər var. Bəzi çaylarda suyun səviyyəsi artıb, daşqın müşahidə olunur. Hazırda Vöhtala kəndi ilə rayon mərkəzinin əlaqəsi kəsilib.
Rayon mərkəzində ağacların aşması ilə bağlı ciddi hal qeydə alınmayıb. Sadəcə, sel suları çay yatağına ağaclar gətirib. Bəzi ərazilərdə elektrik enerjisinin verilməsində fasilələr yaranıb. Bu, həm şəhər mərkəzinin bəzi hissələrində, həm də kəndlərdə müşahidə olunur", - deyə məlumatda bildirilir.
