Çində keçirilən dəfn mərasimlərinin birində dronlar fəal iştirak edib.
Oxu.Az "South China Morning Post" nəşrinə istinadən xəbər verir ki, pilotsuz uçuş aparatları mərhumla vidalaşma mərasimində bir neçə fərqli rol icra edib.
Belə ki, dronlardan biri mərhumun obrazını canlandırıb, digəri isə buddist ənənəsində mərhəmət ilahəsi və ruhların himayədarı hesab olunan Quanyini təmsil edib.
Əvvəlcə dronlardan biri süni intellekt vasitəsilə yaradılmış mərhumun səsindən istifadə edərək onun adından yaxınlarına müraciət edib. Daha sonra digər aparat mərasimdə iştirak edənlərə "ilahi varlıq" adından səslənərək mərhumun ruhunu müşayiət etmək üçün gəldiyini bildirib, hamıya sülh və sağlamlıq arzulayıb.
Çində bu yenilik birmənalı qarşılanmayıb. Cəmiyyətin bir qismi bunu duyğusal vidalaşma üsulu kimi qiymətləndirib, digərləri isə ənənəvi dəfn mərasimi elementlərinin texnoloji obrazlarla əvəzlənməsinə ehtiyatla yanaşıb.
