Venesuela ABŞ hərbi gəmilərinin Karib dənizində yerləşdirilməsi ilə bağlı BMT-nin baş katibi Antonio Quterreşə müraciət edib.
Oxu.Az-ın xəbərinə görə, bu barədə Bolivar Respublikasının Xarici İşlər Nazirliyinin rəhbəri İvan Xil Pinto öz "Telegram" kanalında məlumat verib.
O qeyd edib ki, Karakas "sağlam düşüncənin bərpa edilməsi" ilə xahişi ilə Quterreşə müraciət edib və ABŞ hərbi birləşmələrinin, hətta ABŞ-nin nüvə silahlarının Karib hövzəsində yerləşdirilməsindən narahatlığını ifadə edib ki, bu, sülh üçün təhlükədir. Venesuela tərəfinin BMT koordinatoru ilə görüşü zamanı Vaşinqtonun regionda düşmənçilik hərəkətlərini gücləndirməsi müzakirə olunub.
XİN rəhbəri vurğulayıb ki, BMT-nin Narkotiklər və Cinayətkarlıq İdarəsi (UNDOC) Venesuelanı "qeyri-qanuni əkinlərdən" azad ərazi hesab edir. Xil bildirib ki, ABŞ-nin narkotik ticarəti ilə bağlı saxta ittihamları Bolivar Respublikasına qarşı təcavüz üçün bir bəhanədir.
Xatırladaq ki, avqustun 24-də Venesuela prezidenti Nikolas Maduro ABŞ-nin müdaxiləsi təhlükəsinə cavab olaraq, Bolivar Milli Milislərinə səfərbərlik elan edilməsi kampaniyasını dəstəkləyib.
Qeyd edək ki, avqustun 19-da Pentaqon narkotik kartellərinə qarşı mübarizəni gücləndirmək üçün Venesuela sahillərinə üç hərbi gəmidən ibarət dəstə göndərib.
