ABŞ Hərbi Dəniz Qüvvələri (HDQ) Venesuela sahillərinə səkkiz hərbi gəmi göndərib.
Oxu.Az-ın xəbərinə görə, bu barədə "Financial Times" (FT) qəzeti vəziyyətlə tanış olan mənbələrə istinadən məlumat yayıb.
Məlumata görə, gəmilərin göyərtəsində bir neçə min amerikalı hərbçi var. Nəşrin müəllifləri regionda dəniz potensialının bu cür artırılmasını qeyri-adi adlandırıblar.
"ABŞ Hərbi Dəniz Qüvvələri bölgəyə ən azı yeddi gəmi, o cümlədən üç idarə olunan raket esminesi, bir amfibiya gəmisi və bir idarə olunan raket kreyseri göndərdi. Həmçinin nüvə enerjisi ilə işləyən sürətli hücum edən sualtı qayıq da yerləşdirilib", - deyə nəşr yazıb.
Qeyd olunub ki, iki idarə olunan raket esminesi - "USS Jason Dunham" və "USS Gravely" hazırda Venesuela sahillərindədir. "USS Sampson" esminesi Panamanın cənubunda Sakit okeanda yerləşib. Bundan əlavə, bölgəyə "USS Iwo Jima" desant gəmisi və iki dəstək gəmisi göndərilir. Onların içində ümumilikdə 4500-dən çox amerikalı hərbçi olduğu bildirilir. Vaşinqton, həmçinin Venesuela sahillərinə idarə olunan raket kreyseri "USS Lake Erie" və nüvə sualtı gəmisi "USS Newport News"u göndərəcək. Səkkiz gəmidən beşi "Tomahawk" qanadlı raketləri ilə təchiz olunub.
Xatırladaq ki, avqustun 27-də Bolivar Respublikasının Xarici İşlər Nazirliyinin rəhbəri İvan Hil Pinto bəyan edib ki, Venesuela ABŞ hərbi gəmilərinin Karib dənizinə köçürülməsi ilə bağlı BMT-nin baş katibi Antonio Quterreşlə əlaqə saxlayıb.
Avqustun 19-da NBC telekanalı məlumat vermişdi ki, Pentaqonun narkotik kartellərinə qarşı mübarizəni gücləndirmək üçün Venesuela sahillərinə üç hərbi gəmidən ibarət dəstə göndərilir.
