ABŞ-li iş adamı, "SpaceX" şirkətinin təsisçisi İlon Mask Birləşmiş Ştatlarda keçiriləcək aralıq Konqres seçkisi ərəfəsində Respublikaçılar partiyasına maddi dəstək göstərmək məqsədilə "America PAC" adlı siyasi fəaliyyət komitəsinin işini bərpa etmək qərarına gəlib.
Oxu.Az xəbər verir ki, bu barədə məlumatı "Axios" informasiya portalı yayıb.
Məlumata əsasən, səsvermədə iştirak səviyyəsini yüksəltmək üçün iri həcmdə maliyyə vəsaiti ayrılacaq. Kampaniyanın əsasən qapı-qapı gəzmək, kütləvi informasiya vasitələrində reklamlar yerləşdirmək və poçt vasitəsilə məktublar göndərmək kimi üsulları əhatə edəcəyi gözlənilir. Bunun başlıca məqsədi aralıq seçkilərində adətən iştirak etməyən mühafizəkar vətəndaşları səsverməyə cəlb etməkdir.
Portalın yazdığına görə, milyarder nəzərdə tutulan köməyin detallarını ABŞ Prezidenti Donald Trampın nümayəndələri ilə artıq müzakirə edib. Sözügedən layihəyə onun məsləhətçisi Kris Yeng rəhbərlik edəcək. Digər qurumlar hazırkı mərhələdə daha çox telekanallardakı reklamlara diqqət ayırdığı halda, "America PAC" komitəsi birbaşa seçicilərlə canlı təmas qurmağı hədəfləyir.
